Nas terras de Pondal

Xoves, 31 de xullo de 2008

Apagha a tele! é unha canción do magnífico grupo de hip-hop de Ordes, Dios ke te crew, e tamén podería ser o nome dunha iniciativa que comeza a circular pola rede e que, dende aquí, humildemente, queremos publicitar e apoiar.

A iniciativa sae ao paso do apoio que Tele 5 prestou publicamente ao “Manifiesto por la lengua común”, manifesto que pide unha maior regulación en favor do castelán e contra as demais linguas do estado, como a galega, defendendo a asimetría para as linguas e o aumento dos privilexios para a “súa lingua común”. Non só apoiaron publicamente e asinaron o manifesto, senón que ademais informaron nun telexornal do mediodía de que puñan a súa canle a disposición desta iniciativa. A actitude de Tele 5 coas linguas distintas do castelán, por outro lado, tampouco é nova, só hai que lembrar o desprezo co que tratan a nosa toponimia, a pesar das moitas queixas que se lle fixeron chegar, e a persistencia no uso de “La Coruña”, “Orense”…

Xa que logo, a iniciativa convida, e dende aquí convidamos tamén, a dessintonizar Tele 5 dos nosos aparellos de televisión, a non volver conectar con esta canle, a ver se pola baixada das audiencias entenden. Igualmente, aínda que parte de Catalunya, tamén se pode apoiar outra iniciativa de envío de mails masivos, tanto a Tele 5, como ás empresas anunciadoras como á administración, de queixas pola actitude desta canle. A iniciativa, da Plataforma per la Llengua, é totalmente on-line, polo que non custa nada darlle un empuxón, e podedes facelo desde este enlace.

Por suposto, quizais aínda máis recomendábel que todo o anterior sexa facer caso aos Dios ke te crew, e directamente apagar o aparello de televisión.

Mércores, 30 de xullo de 2008

Hai titulares que é difícil resistirse a comentar, ou que incluso, con traelos e expolos, xa fican comentados. Velaquí un caso: Fernando Martín, o multimillonario que quere ser insolvente. Un home que o ano pasado declarou beneficios de case cen millóns de euros, que posúe participacións empresariais nalgunhas das máis importantes multinacionais do estado, acode ao xulgado para pedir concurso de acredores sobre a súa persoa.

Este é o país que temos, o país do capital. A grande reflexión é: para toda a xente que ficará no paro despois da quebra de Martinsa-Fadesa, haberá concurso de acredores? É máis, poderán declararse insolventes e non pagar a luz, o gas…? A vida é a repanocha. E este home, que seica non ten un can e acude ao xulgado a declararse na ruina, vivirá debaixo dunha ponte no que lle resta de vida ou manterá a residencia nas súas mansións? Como é obvio, evitaremos dar respostas innecesarias. Esta é, amigos e amigas, a realidade do mundo capitalista que nos están a construír, unha realidade bastante obscena.

Martes, 29 de xullo de 2008

En vías de remate os congresos “populares” nos que o debate se centrou nas opcións da corrente crítica (que se demostraron mínimas) de tumbar á corrente marianista, agora están de congresos as bases socialistas. Aquí, afortunadamente, hai un algo máis (non moito, tampouco se crean) de vida, de debate, e algún, incluso, risíbel a estas alturas da película. Resulta que, segundo a que socialista lle preguntemos, somos unha cousa ou outra. Como van saber gobernar ben o noso país se non se aclaran ao definilo… Somos nación? Somos nacionalidade histórica? Somos unha realidade nacional? Somos unha nación no sentido non nacionalista da palabra? O que hai que oír… pasen e vexan.

Ler máis… »

Luns, 28 de xullo de 2008

O escenario político en Malpica de Bergantiños semellaba complexo tras as últimas municipais, mais as actuacións dos distintos partidos non fai máis que complicalo. O alcalde, Ramón Varela (PSOE), renegou da opción dun pacto de goberno estábel, e converteuse no único de toda a bisbarra de Bergantiños en gobernar en solitario. As cábalas que o levan a seguir “vivo” son cada días máis rocambolescas: unha alcaldía debida á lealdade do BNG, que o votou para o bastón de mando en cumprimento dun acordo nacional; unhas dedicacións exclusivas (a súa e a do seu socio de goberno, Alfredo Cañizo) aprobadas grazas ao PP; os orzamentos do presente ano sacados adiante con malas artes, aproveitando a falta de dilixencia da administración local (ou quizais provocándoa?) e a ausencia/retraso na toma de posesión dun concelleiro do BNG. Agora, a fractura do Partido Popular en Malpica de Bergantiños abre novas incógnitas.

Ler máis… »

Domingo, 27 de xullo de 2008

“As persoas que promovemos esta chamada queremos manifestar, perante as institucións de autogoberno e como aclaración perante a sociedade galega, o seguinte:

Ler máis… »