Mércores, 02 de xullo de 2008
Nao, Caravan Palace, Lamatumbá, The Internacional Noise Conspiracy, Víctor Aneiros Band, Quempallou (por certo, autores da canción que agora mesmo escoitas), Pablo Milanés e Berrogüeto xa quedaron nun mesmo lugar nunhas mesmas datas. E ti, vas faltar?
Aínda non se coñece o deseño do cartaz (como se pode comprobar, o que aparece na imaxe corresponde coa edición do ano pasado) nin está aínda á vista o programa completo do Festigal 2008, mais a páxina web xa nos ofrece como adianto o conxunto de actuacións musicais que encherán o campus sur compostelán as noites do 24 e 25 de xullo.
O Festigal é a grande festa do nacionalismo, artellada arredor do día da patria (que segue sendo a xornada central, e nela, a grande manifestación que ás 12 da mañá sairá da alameda), herdeira das arengas da mocidade antano programadas por Galiza Nova, e organizada, como todos os anos, pola Comisión Festigal, a fundación Galiza Sempre e a propia organización xuvenil Galiza Nova.
No Festigal sempre tiveron acubillo as máis diversas propostas: concertos, proxeccións audiovisuais, debates sobre temas de interese e actualidade, presentacións de libros, galerías de artesanía e asociacións, e unha longa proposta de actividades que, para o presente ano (será a sétima edición), como se dixo, aínda non se coñecen na súa totalidade.
O dito, se tiñades plans, anuládeos. Este 24 e 25 de xullo, todos e todas a Compostela, o país está de festa e non podedes faltar.
Comentarios Recentes